Awle hei thinlunga insitna leh tlinglo inti em em chungin ka han tive rawih mai a ni. In tanpuina leh thurawn ka mamawh hle dawn a ni.
He Blog alo intan dan leh a chhante han sawi hmasa dawn ila. Kum lamah ka la naupang ve deuh bawk nen, mahni duhdan leh nuam tihzawng hian ka hun tamzawk hi kalo hmang thin a, khawvel nawm chenna hrang hrang mahni phak tawk ah ka bei ve nasa hle thin a ni. Mahse, a hunlai chauh pawh a daih zolo, chu hlimna emaw ka tihchuan min liamsan leh zung zung thin a ni. Hlimna leh lawmna tluantling minpe ngai chuanglo a, chuti chung chung pawh chuan ka la hawikir duh chuanglo. Ka hun ala thlenglo a niang tiin ka inhnem hram hram thin.
19 August 2013 zan atang khan rilru thar kalo pu ve ta a ni. Hemi zan hi TKP member inkhawm kim zan atan anlo ruahman a(Lawngtlai ah ka cham lai a nia), Rev. R. Lalbiakliana chu thusawi turin anlo sawm chu niin, kei erawh chuan engmah ka hrelo. Kan thiannu hian inkawm ve turin min sawm char char a, "nia nia" ka ti liam vel mai mai a, mahse tum em em chuanglo chuan chaw pawh eihman lo chuan ka inkhawm ve ta hram a. Han sawi ta tawp ila, ka inkhawm chhan ber chu Nula pakhat vang a ni. Thuhma leh special item atam khawp mai. TKP member zawng zawng aia tam daih inkhawm kan awm a ni. Zai vel a nuam em em a, mak deuh mai hian keimah ah hian danglamna a awm tlat a ni. Inkhawm tan hma a thalai an han zai thap thap te khan ka lung ati leng em em mai a, kohhran ho zingah hian ka va mikhual em tih ka rilru ah alo lang a, thalai tamtak hlim taka an zai ka hmuh te khan ka thik em em a ni. Engvangin nge ka inthlahrun dek bik le? Ka ngaihtuahna a kal thui tan khawp mai.
Ka tum dan tak chuan thusawi pawh ngaithla lemlo a haw leh daih kha ka tum ber zawk chu a ni. Mahse ka ngaihtuahna a kalthui tulh tulh a, inkhawm kha nuam ka ti ta em em a ni. Chuan thusawitu tur a rawn din meuh chuan darkar khat lai hun a kal der tawh a ni. Thusawitu tur hi kan khua a ka kawmve ber thin ka thianpa Patea a ni. Kan khua te ka ngaihtuah a, ka lung pawh aleng ang reng hle a ni. Thalai inkhawm ani bawk a, thalai tana thusawi dan a thiam hle mai.
A thusawi a ngaihnawm em em a, a thusawi zing a min khawih bertu chu hei hi a ni. Tehkhin thu hmangin thalaite nun a rawn tehkhin a, chumi chuan min hneh ta em em a ni. Chu a thusawi chu thiam ang angin han sawi chhawng ve dawn teh ang.
Ramdangah rawngbawlna avangin an zin a, an zinna khawpuiah chuan Bazar te an tlawh kual zo an thlenna lam pan tura an haw kawng ah chuan kawng pengthuam hi alo awm a, chu pengthuam atang chuan kal ngaihna reng a hre talo, niawm a ahriatna ah chuan a han kal ringawt a, a han kal zel a, mahse a hriat ngailoh hmun mawi leh nuam tak tak te kha a hmu ta a, mahse a tum ram chu a thleng thei silo. A mangangin a thlamuang talo hle mai a, thlamuanglo tak a kal zel aichuan kawng pengthuam lam kha pan a rilruk leh ta zawk a. Chuan a kir leh ta a ni.
Pengthuam ava thlen leh chuan niawm a ahriat ber ah khan a kal risk leh ta a, a kal zel chuan an kal lama a hmuhhnu tam tak kha a hmu ta zut zut mai a, a hlimin a lawm ta em em a, a kal fe hnu chuan an thlenna Hotel pawh chu alo lang ta a ni. A hlimin a lawm em em bawk a ni.
Thalaite hi kan duhna kawng kawng ah, kan duh dan dan in tlan mah ila kan zawn hlimna leh thlamuanna chu kan hmu silova, thlamuanglo leh hlauthawng reng a awm aichuan kha kawng kha zawh tawhloin, kawng thar chatuan nunna leh hlimna kawng chu zawh mai a fuh zawk thu a rawn tehkhin a ni.
He a thusawi hian ka nun chu a rawn tichiang em em hian ka hria a, mahni duh dan dan leh nuam tihzawng ang ang pawn han awm mah ila, hlimna, thlamuanna chu ka hmu ngailo. Chuvangin kawngdik zawk chu zawh zawk tawh turin ka rilru ka siamta a ni. LALPA chakna ringin, a fapa ata tlanbo tawh chu a hnen ka pan leh ta a ni. He kawng thar zawhve tur hian kan rilru i siam theuh ang u. LALPA ropui ber rawhse.
